《速成病房生存之道：姑娘與呀姐》
有人問 套核突天使係套膠劇 點解我要睇
套野膠位固然係多 但係又唔係全部假野
我就係又要屌 但又想睇佢點膠落去～
個病房呀姐就真係演得入型入格 入木三分
D神情語氣 就好似漆黑中的螢火蟲咁鮮明 咁出眾
是咁的 病房呀姐請返黎係想分擔部分護理工作
例如 換屎片 餵病人食野 Bra Bra Bra
不過好多上左年紀 有返咁上下seniority 都會有氣勢同覺得自己有權威
小毒 做學生果陣係唔會夠膽點呀姐做野
但做左RN 睇成十八至二十幾人果陣
的確可能要去準備EOT （緊急手術） 輸血 轉病人去ICU/Reha的時候
有病人話要換屎片 想我地幫佢轉身 用Benpan
我都會煩請姐姐幫手
套膠劇話醫生同姑娘似兩公婆關係
我就話呀姐同姑娘係兩母女的關係
佢地年紀大經驗多 你會尊重同聽佢地講
但做姑娘你都有自己工作不可被人取代的部分
你要請呀姐做野 就好似對老母咁有禮貌（又"矮"又西）
因為呀姐都係要哄架 佢地知你尊重佢地 就會無咁容易托手睷㬹架喇
當然有時老母講野又唔係野野都岩晒ge～
有次個病人隻手腫起來 隻黃色戒指 卡死左係手指到
呀姐一望就話：（卡到咁死 扑爛佢先搞得掂 無得搞架喇）
毒毒：（哦 等我轉頭研究下先）
呀姐走左無耐 小妹我汁齊「加餐」 帶手套 用左三包KY JEL 終於拎返出黎
戒指係屬於一個昏迷婆婆的 你永遠唔會知道 依隻戒指對佢有幾大意義
做姑娘 要識得尊重人之外
又要識critical thinking 唔係人講你就信
但又唔好challenge 人地～
因為大家都係為patient 好姐
而且毒毒都係為埋自己好炸
因為班靚姐會得閒煲靚湯糖水俾同事食
依D咪和諧工作間的其中一件樂事囉！
Search